Kandidatja e PS në qarkun e Tiranës, Blerina Gjylameti ka folur sot për programin qeverisës të PS në mandatin e katërt që kërkon të marrë në zgjedhjet e 11 majit. Gjylameti tha se kur erdhi PS në pushtet, skema e pensioneve ishte në kolaps.
“Do të duhet të rishikohet skema e pensioneve. Ne e kemi kthyer në funksionalitet, duhet të formalizohet tregu i punës, kontributet. Por duhet të dini se në 2013 ne kaluam në taksimin progresiv dhe kjo ka qenë në linjë me shëndoshjen e financave.
Bonusi që dhamë ishte rastësor në varësi të ecurisë ndër vite. Por nuk ishte i përcaktuar. Ndërsa tashmë e kemi në ligj. Duke pasur ekonominë e mirëfunksionuar, këto ndihmojnë skemën e pensioneve, që të bëjmë pensionin minimal aq sa e kemi premtuar”, tha Gjylameti.
Gjithashtu ajo tha se në programin e PS, është parashikuar që paga minimale synohet që të miratohet në qershor 2025, të jetë 500 euro. “Kurse për pagën mesatare synimi është të jetë 1000 euro deri në fund të mandatit tjetër”, tha Gjylameti.