TIRANË– Policia ka arrestuar një 46-vjeçar të shpallur në kërkim për vepra të rënda penale.
Shtetasi i arrestuar është identifikuar si D. B., 46 vjeç, banues në Durrës, i cili ishte në arrati që prej vitit 2023, kur Gjykata e Posaçme (GJKKO) kishte caktuar ndaj tij masën e sigurisë “Arrest në burg”.
Bazuar në atë që raportojnë autoritetet, D. B. akuzohet për veprat penale “Prodhimi dhe shitja e narkotikëve”, “Grupi i strukturuar kriminal” dhe “Kryerja e veprave kriminale nga grupi i strukturuar kriminal”. Operacioni u zhvillua nga Forca e Posaçme Operacionale e Policisë së Shtetit, në bashkëpunim me Drejtorinë Vendore të Policisë Durrës, pas informacioneve se i kërkuari po qarkullonte me automjet në zonën e Malit të Tomorrit.
Pas kapjes, u ekzekutua masa e sigurisë “Arrest në burg”, ndërsa materialet procedurale iu referuan Prokurorisë së Posaçme (SPAK) për hetime të mëtejshme.
NJOFTIMI I POLICISË:
Policia e Shtetit
Operacione të njëpasnjëshme nga Drejtoria e Forcës së Posaçme Operacionale në DPPSh, për kapjen e shtetasve në kërkim.
Finalizohet operacioni policor i koduar “Operacionalja 60”.
Lokalizohet në Malin e Tomorrit, kapet dhe vihet në pranga një i kërkuar, me masë sigurie “Arrest në burg”, caktuar nga GJKKO-ja.
Në vijim të operacioneve të njëpasnjëshme për kapjen e shtetasve të shpallur në kërkim, strukturat e Drejtorisë së Forcës së Posaçme Operacionale në DPPSh, në bashkëpunim me DVP Durrës, finalizuan operacionin policor të koduar “Operacionalja 60”.
Bazuar në informacionet e siguruara se në Malin e Tomorrit po qarkullonte me automjet, një shtetas i kërkuar për vepra penale në fushën e narkotikëve, të kryera në formën e organizatës kriminale, shërbimet e Drejtorisë së Forcës së Posaçme Operacionale lokalizuan, kapën dhe ndaluan shtetasin D. B., 46 vjeç, lindur dhe banues në Durrës.
Ky shtetas ishte shpallur në kërkim, pasi Gjykata e Shkallës së Parë Kundër Korrupsionit dhe Krimit të Organizuar, Tiranë, në vitin 2023, i ka caktuar masën e sigurisë “Arrest në burg”, për veprat penale “Prodhimi dhe shitja e narkotikëve”, “Grupi i strukturuar kriminal” dhe “Kryerja e veprave kriminale nga grupi i strukturuar kriminal”.
Nga ana e Seksionit për Hetimin e Narkotikëve pranë Drejtorisë Vendore të Policisë Durrës u bë ekzekutimi i masës së sigurisë “Arrest në burg”, dhe materialet procedurale iu referuan Prokurorisë së Posaçme Kundër Korrupsionit dhe Krimit të Organizuar, Tiranë, për hetime të mëtejshme./Radar.al