Drejtori i Përgjithshëm i Policisë së Shtetit, Drejtues Madhor Ilir Proda, së bashku me drejtorin e Drejtorisë Vendore të Policisë Tiranë, Drejtues Elton Alushi, kanë takuar dhe falënderuar dy efektivët e Patrullës së Përgjithshme të Komisariatit Nr. 2, të cilët neutralizuan dhe arrestuan autorin e një tentative për grabitje banke në kryeqytet.
Inspektor Ermal Çeku dhe Inspektor Eduart Saliko reaguan në kohë rekord pas njoftimit për një person të armatosur që kishte grabitur një shumë parash në një filial banke në zonën e ish-Parkut të Autobusëve. Autori, një 58-vjeçar, kishte kërcënuar me kallashnikov punonjësit e bankës dhe tentoi të largohej me shumën e grabitur.
Falë ndërhyrjes së menjëhershme të policisë, ai u neutralizua dhe u arrestua, ndërsa u sekuestruan arma e zjarrit dhe paratë e marra.
Gjatë fjalës së tij para efektivëve të Komisariatit Nr. 2, Proda vlerësoi profesionalizmin dhe guximin e dy inspektorëve, duke theksuar se reagimi i tyre është shembull i standardit që përfaqëson Policia e Shtetit.
“Përballë një personi të armatosur, vepruat me vendosmëri dhe kontroll të plotë të situatës, duke neutralizuar autorin dhe sekuestruar armën e zjarrit dhe shumën e grabitur. Këto veprime nderojnë uniformën dhe forcojnë besimin e qytetarëve tek Policia e Shtetit”, u shpreh Proda.
Ai shtoi se ndjehet krenar dhe mirënjohës për çdo efektiv që mishëron profesionalizmin, guximin dhe përgjegjësinë në shërbim të qytetarëve dhe të ligjit.
Ngjarja u bë e mundur të parandalohej falë reagimit të shpejtë të policisë, e cila u njoftua nga një klient i bankës.