LEZHË– Presidenti i Besëlidhjes, Ylli Ujka, ka uruar ekipin lezhjan të basketbollit për fitoren e thellë dhe spektakolare ndaj Tiranës, në ndeshjen e zhvilluar në “Asllan Rusi”.
Skuadra e Besëlidhjes ka treguar forcë, shpirt gare dhe vendosmëri, duke triumfuar bindshëm ndaj ekipit kryeqytetas dhe duke entuziazmuar tifozët lezhjanë.
Në reagimin e tij pas ndeshjes, presidenti Ujka ka ndarë emocionet me një mesazh të ndjerë:
“Çfarë krenarie për Lezhën, për qytetin tonë! Faleminderit kampionëve tanë, profesor Afrimit, gjithë stafit të jashtëzakonshëm dhe në mënyrë të veçantë Kryetarit të Bashkisë, z. Pjerin Ndreu, për mbështetjen, vizionin dhe shpirtin e fitores. Kjo fitore i dedikohet të gjithë lezhjanëve, kudo që ndodhen – në Shqipëri apo në diasporë. Të vazhdojmë të mbështesim ekipin që di të fitojë”, shkruan Ujka.
Në themel të këtij suksesi qëndron një mbështetje solide financiare dhe organizative. Kompania X-ONE, në pronësi të Ylli Ujkës dhe ortakut të tij Çesk Ivanaj, është kthyer në një shtyllë të fortë për Besëlidhjen. Dyshja e biznesmenëve kanë investuar me vizion dhe pasion, duke ndërtuar një ekip që lufton me zemër dhe nuk dorëzohet./Radar.al