Presidenti i Republikës së Shqipërisë, Bajram Begaj, së bashku me Zonjën e Parë Armanda Begaj, kanë zhvilluar një takim të veçantë me Presidentin e Shteteve të Bashkuara të Amerikës, Donald Trump, dhe Zonjën e Parë Melania Trump, gjatë vizitës së tyre zyrtare në SHBA.
Takimi u zhvillua në një atmosferë të ngrohtë dhe miqësore, duke reflektuar lidhjet historike dhe strategjike që kanë bashkuar Shqipërinë dhe Shtetet e Bashkuara ndër vite. Dy çiftet presidenciale shkëmbyen përshëndetje të ngrohta dhe biseduan mbi marrëdhëniet e shkëlqyera mes dy vendeve.
Presidenti Begaj ndau në rrjetet sociale disa momente fotografike nga takimi, të cilat shënuan një moment simbolik në marrëdhëniet mes Tiranës dhe Uashingtonit. Në postimin e tij, Kreu i Shtetit shqiptar theksoi rëndësinë e partneritetit të qëndrueshëm me SHBA.
“Miqësia shqiptaro-amerikane, një lidhje e fortë dhe e pathyeshme, një aleancë historike dhe strategjike,” shkroi Begaj në postimin e tij.
Ky takim vjen në një periudhë ku bashkëpunimi politik, ekonomik dhe ushtarak mes dy vendeve po thellohet gjithnjë e më shumë, duke riafirmuar rolin e SHBA si aleati kryesor strategjik i Shqipërisë në arenën ndërkombëtare.