Spanja vijon të luftojë me flakët në veriperëndim dhe perëndim të vendit, ku njësi të ushtrisë janë vendosur për të ndihmuar në përballimin e situatës.
Franca dhe Italia kanë ofruar mbështetje për shuarjen e vatrave në rajonet e Kastiljes dhe Leonit, Galicisë, Asturias dhe Extremadurës. Ndërkohë, rreth 10 rrugë kryesore mbeten të mbyllura, po ashtu edhe linja hekurudhore Madrid–Galicia.
Shërbimet e emergjencës në Galicia kanë shpërndarë mesazhe alarmi, duke u kërkuar banorëve në dhjetëra qytete të marrin masa paraprake.
Kryeministri Pedro Sanchez vizitoi një prej rajoneve më të prekura, ku propozoi një “pakt kombëtar” për t’u përballur me emergjencën klimatike. Ai tha se qeveria do të punojë që deri në shtator të vendosen bazat e këtij pakti.
Ekspertët theksojnë se ndryshimet klimatike të shkaktuara nga njeriu po rrisin intensitetin, kohëzgjatjen dhe shpeshtësinë e valëve të të nxehtit, të cilat nxisin edhe përhapjen e zjarreve në pyje.