Moti i keq që përfshiu Ballkanin gjatë orëve të natës ka lënë pas një viktimë, të paktën 13 të plagosur dhe dëme të shumta në infrastrukturë, bujqësi dhe objekte publike në disa vende të rajonit.
Stuhitë, të shoqëruara me reshje intensive dhe erëra shumë të forta, erdhën pas një periudhe të gjatë temperaturash ekstreme dhe thatësire që ka prekur Evropën Qendrore dhe Ballkanin.
Në Shqipëri, një elektricist humbi jetën në Himarë gjatë përpjekjeve për të riparuar një linjë energjie elektrike të dëmtuar nga stuhia. Në Sarandë, tre persona përfunduan në spital pasi u plagosën nga rrëzimi i pemëve dhe copat e xhamit të thyer.
Në Bosnje dhe Hercegovinë, dëmet më të mëdha u regjistruan në rajonin e Hercegovinës, veçanërisht në zonën e Nevesinjes. Kryetari i bashkisë, Milenko Avdaloviç, bëri të ditur se humbjet në sektorin e bujqësisë arrijnë në miliona marka boshnjake. Sipas tij, stuhia shkatërroi pothuajse tërësisht të mbjellat me patate, qepë, lakra dhe pemishtet, ndërsa dëme të konsiderueshme u raportuan edhe në vreshtat e Grudës dhe Ljubushkit.
Edhe Maqedonia e Veriut u godit rëndë nga moti ekstrem. Në Shtip, erërat arritën deri në 134 kilometra në orë, ndërsa në Shkup deri në 130 kilometra në orë. Qendra e emergjencës 112 mori më shumë se 9 mijë telefonata, ndërsa autoritetet konfirmuan 10 persona të plagosur.
Në kryeqytetin Shkup u dëmtuan mbi 100 automjete, u rrëzuan 189 pemë dhe u dëmtuan disa institucione publike, mes tyre godina e Presidencës, disa ministri dhe aeroporti.
Ndërkohë, edhe Kroacia u përball me stuhi të forta, kryesisht përgjatë bregdetit të Adriatikut. Në ishullin Hvar, niveli i detit u rrit me rreth 1.5 metra, duke përmbytur shëtitoren dhe disa rrugë në qytetin Stari Grad. Rritje e nivelit të detit u regjistrua edhe në ishujt Vis dhe Korçula, megjithëse pa pasoja të konsiderueshme materiale.
Ekspertët e klimës paralajmërojnë se fenomenet ekstreme të motit po bëhen gjithnjë e më të shpeshta dhe më intensive si pasojë e ndryshimeve klimatike dhe ngrohjes globale, duke rritur rrezikun për ngjarje të tilla në të ardhmen.