Ministri i Jashtëm i Polonisë, Radoslaw Sikorski, deklaroi se hyrja e dronëve rusë në hapësirën ajrore polake nuk ishte rastësi, por një akt i qëllimshëm që përbën kërcënim të drejtpërdrejtë për sigurinë evropiane.
“Nuk kemi asnjë dyshim se dronët që hynë në Poloni nuk ishin aksident”, u shpreh ai për Reuters, duke e cilësuar incidentin si një “sulm të paprecedentë ndaj NATO-s dhe Evropës”.
Ngjarja ndodhi gjatë një vale të re sulmesh ruse mbi Ukrainën, kur disa dronë kaluan kufirin dhe u rrëzuan nga ushtria polake. Tensionet janë rritur brenda aleancës, ndërsa kryeministri Donald Tusk ka urdhëruar forcimin e menjëhershëm të mbrojtjes ajrore të vendit.
Sipas Sikorskit, përdorimi masiv i dronëve nga Rusia nuk është vetëm një sfidë për Ukrainën, por një kërcënim i drejtpërdrejtë për të gjithë aleatët e NATO-s.