Vrasja tronditëse në familjen Rama në fshatin Frashër të Fierit ka lënë të shokuar familjarët dhe komunitetin. Viktima, Anesti Rama, 56 vjeç, dyshohet se është mbytur nga vajza e tij pas një konflikti të ashpër në banesë.
Vëllai i viktimës, Ferdinant Rama, i cili jeton prej vitesh në Greqi, ka treguar për mediat se kishte më shumë se dy vjet e gjysmë që nuk kishte folur me Anestin. Sipas tij, kjo ndodhte sepse bashkëshortja e të ndjerit, Valbona Rama, nuk e lejonte të fliste me të.
“E mora vesh lajmin nga kunata, ajo telefonoi gruan time dhe i tha që Anesti kishte vdekur. Kam qenë i ndërprerë nga kontakti me të për më shumë se dy vjet e gjysmë”, u shpreh ai.
Ferdinanti shton se në familjen e të ndjerit kishte pasur prej kohësh konflikte dhe mosmarrëveshje. Ai thekson se Anesti punonte në një biznes lokal dhe se marrëdhëniet në familje ishin të tensionuara.
Të njëjtin shqetësim e konfirmon edhe kushëriri i viktimës, Edmont Rama, i cili thotë se policia ka qenë shpesh e pranishme në banesën e familjes për shkak të konflikteve të vazhdueshme mes çiftit.
Trupi i 56-vjeçarit ndodhet ende në morgun e Fierit dhe po i nënshtrohet ekspertizës mjeko-ligjore për të zbardhur rrethanat e sakta të vdekjes. Ndërkohë, vajza e tij ndodhet në paraburgim në pritje të hetimeve të mëtejshme.