Dogana e Kosovës ka njoftuar se në Aeroportin Ndërkombëtar “Adem Jashari” në Prishtinë, njësitë doganore kanë sekuestruar përkohësisht dy orë luksoze, një Richard Mille dhe një Rolex, me vlerë totale 1.340.027,50 euro, pasi ato nuk u deklaruan gjatë kalimit në Kanalin e Gjelbër.
Rasti është referuar Prokurorisë Themelore të Prishtinës, pasi shmangia nga obligimet doganore tejkalonte shumën prej 5,000 euro. Mozzik, sipas mediave lokale, është personi në fjalë dhe është intervistuar më 17 shtator, por është liruar menjëherë në procedurë të rregullt. Dy orët mbeten të ndaluara deri në vendimin përfundimtar të Prokurorisë.
Dogana thekson se veprimet e saj janë në përputhje me ligjin dhe kanë për qëllim parandalimin e shmangieve nga obligimet doganore dhe mbrojtjen e pasurisë së pajustifikuar.
Mozzik ka reaguar përmes rrjeteve sociale, duke mohuar arrestimin dhe pretendimet për borxh ndaj Administratës Tatimore të Kosovës, dhe ka sqaruar se ishte thjesht një procedurë e dhënies së deklaratës për hetimin e orëve të sekuestruara.
