Një aksident tragjik rrugor ka tronditur Nigerinë, ku 22 sportistë dhe zyrtarë ndërruan jetë pas një aksidenti të autobusit me të cilin po ktheheshin nga Festivali Kombëtar i Sporteve. Ngjarja e rëndë ndodhi pas përfundimit të edicionit të 22-të të festivalit, i cili u zhvillua në shtetin Ogun, në jugperëndim të vendit.
Sipas autoriteteve, viktimat ishin pjesë e një delegacioni që kishte përfaqësuar me dinjitet shtetin e tyre në garat sportive që zgjatën 11 ditë. Komisioni Kombëtar i Sportit i Nigerisë (NSC) shprehu dhimbje të thellë për humbjen, duke nënvizuar se atletët ishin kthyer “pas një përfaqësimi me nder”.
Dyshohet se shkaku i aksidentit ka qenë kombinimi i lodhjes së shoferit dhe shpejtësisë së lartë, ndërsa nga aksidenti raportohet edhe për disa të plagosur, megjithëse numri i saktë ende nuk është konfirmuar zyrtarisht.
Për nder të viktimave, autoritetet nigeriane kanë shpallur të hënën ditë zie kombëtare.