Presidenti amerikan, Donald Trump, i ka kërkuar Departamentit të Mbrojtjes të SHBA-së të përgatitet për veprime ushtarake kundër Nigerisë, duke e akuzuar qeverinë nigeriane se nuk po mbron besimtarët e krishterë dhe lejon vrasjen e tyre.
Në një postim në rrjetin social Truth Social, Trump e quajti Nigerinë “shtet të turpshëm” dhe paralajmëroi se çdo sulm amerikan do të jetë “i shpejtë, i egër dhe i ëmbël”. Ai njoftoi gjithashtu ndalimin e menjëhershëm të të gjitha ndihmave amerikane ndaj Nigerisë, vendit më të populluar të Afrikës dhe një prodhuesi kryesor të naftës.
Reagimi i tij pasoi vendimin e administratës për të rikthyer Nigerinë në listën e “Vendeve me Kujdes të Veçantë” për shkelje të lirisë fetare, ku përfshihen edhe Kina, Mianmar, Koreja e Veriut, Rusia dhe Pakistani. Presidenti nigerian, Bola Ahmed Tinubu, hodhi poshtë akuzat për intolerancë fetare dhe theksoi përpjekjet e qeverisë për të mbrojtur të drejtën e besimit për të gjithë qytetarët.
Nigeria ka një histori të gjatë bashkëjetese paqësore midis grupeve etnike dhe besimeve të ndryshme, megjithëse shpesh ndodhin shpërthime dhune, sidomos për shkak të konflikteve etnike dhe grupit ekstremist Boko Haram, i cili ka terrorizuar verilindjen e vendit për 15 vitet e fundit. Shtetet e Bashkuara mbajnë një prani ushtarake të reduktuar në Afrikën Perëndimore, me bazën kryesore në Xhibuti.
Trump kishte renditur më parë Nigerinë si vend të rrezikshëm gjatë mandatit të tij të parë, ndërsa administrata Biden e hoqi vendin nga kjo listë në vitin 2021.