Një aksident tragjik pranë Braunschweig në Gjermani ka lënë të vdekur tre persona, ndërsa një automjet që po ikte nga policia ra nga një urë në kanalin Mittelland. Viktimat janë dy shtetas kroatë dhe një serb, identifikuar si shoferi i automjetit.
Ngjarja nisi të shtunën në mesditë, kur shoferi i një BMW-je me targa të Mynihut injoroi një shenjë ndalimi të policisë në autostradën A2 dhe u largua me shpejtësi të madhe. Patrullat e policisë e humbën për pak minuta nga sytë, por më pas morën thirrje emergjente për një aksident të rëndë.
Hetuesit besojnë se i arratisuri po ngiste me shpejtësi të lartë në autostradën B4, duke tejkaluar makina të tjera dhe duke goditur disa prej tyre. Automjeti më pas përplasi një mur mbrojtës, u kthye në drejtim të kundërt dhe përplasi përballë një makinë tjetër. Goditja ishte kaq e fuqishme sa BMW-ja ra përmes mureve mbrojtëse të urës dhe përfundoi në kanalin Mittelland.
Shoferi identifikohet si një shtetas serb 34-vjeçar, ndërsa pasagjerët e tij janë dy kroatë, 25 dhe 31 vjeç. Në automjetin tjetër, një grua 47-vjeçare dhe një burrë 53-vjeçar nga Hamburgu u plagosën; gruaja është jashtë rrezikut, ndërsa burri mbetet në gjendje kritike dhe u transportua me helikopter në spital.
BMW-ja u nxor nga kanali gjatë fundjavës dhe është sekuestruar për analizë mjeko-ligjore. Hetimet e mëtejshme do të varen nga gjetjet e ekspertëve, ndërsa zyrtarët e prokurorisë vendosin për autopsinë e të ndjerit.
Arsyeja pse shoferi iku nga policia, si dhe rrjedha e saktë e aksidentit, mbeten ende të panjohura.