Vlorë vijon të shijojë ditë të ngrohta dhe diell pas një jave të ftohtë, duke kthyer bregdetin në një terapi natyrore për adhuruesit e detit.
Qytetarë vlonjatë dhe vizitorë nga zona të ndryshme të vendit janë parë duke shijuar plazhin dhe ujin e kristaltë të detit, ndërsa fanatikët e notit nuk hezitojnë të sfidojnë temperaturat e ulëta të ujit, duke e kthyer qëndrimin në det në një zakon të përditshëm.
Përgjatë vijës bregdetare, pushues të moshave të ndryshme relaksohen nën rrezet e diellit, ndërsa veçanërisht të shumta janë familjet me fëmijë, që shfrytëzojnë motin e ngrohtë për të kaluar kohë në natyrë dhe për të shijuar atmosferën e qetë të qytetit bregdetar.
Temperaturat e larta për këtë periudhë e bëjnë Vlorën një alternativë ideale për fundjavë dhe relaksim pranë detit, duke ofruar një pamje të pazakontë për muajin e nëntorit.