FBI-ja ka parandaluar një komplot të dyshuar terrorist në Los Anxheles dhe Orange County, duke arrestuar katër persona që planifikonin sulme gjatë natës së Vitit të Ri, njoftoi Prokurorja e Përgjithshme Pam Bondi.
Katër të arrestuarit, pjesëtarë të një grupi radikal majtist, akuzohen për posedim të pajisjeve shpërthyese të improvizuara (IED) dhe për planifikim të sulmeve të koordinuara që synonin pesë vendndodhje të ndryshme në Los Anxheles, përfshirë automjete dhe zyra të oficerëve të imigracionit.
Drejtori i FBI-së, Kash Patel, tha se një person i pestë u arrestua në Nju Orlins për planifikimin e një sulmi të veçantë. Ai shtoi se të dyshuarit i identifikuan veten si anëtarë të grupit ekstremist “Turtle Island Liberation Front” (TILF).
“Departamenti i Drejtësisë dhe FBI parandaluan atë që do të kishte qenë një komplot terrorist masiv dhe i tmerrshëm në Kaliforni”, shkroi Prokurorja Bondi në rrjetin X.
Plani i dyshuar përfshinte vendosjen e çantave me pajisje shpërthyese të improvizuara në pesë lokacione të ndryshme, duke synuar dy kompani amerikane për t’i shpërthyer njëkohësisht në mesnatën e Vitit të Ri.