TIRANË– Ngjarja e rëndë e 2 Korrikut që ndodhi para SPAK është ende një temë për të cilën flitet dhe ka marrë vëmendjen e qytetarëve për shkak të aktit fatal, ku Pal Trashaj i dha fund jetës. I gjithë ky vendim për shkak të një mikrokredie që i ndjeri kishte marrë.
Sa i takon kësaj ngjarje, në emisionin “7pa5” në Vizion Plus, ishte e ftuar sot ekspertja e ekonomisë Romina Radonshiqi, e cila është shprehur se Trashaj nuk kishte gjetur zgjidhje nga institucionet, teksa ligji nuk e rregullon qartë skemën e mikrokredive.
“Ai i ishte drejtuar edhe institucioneve, por nuk kishte gjetur zgjidhje. Është një rast vërtetv serioz, ku organet duhet të marrin masa që këto mikrokredi të kenë një bazë ligjore më të qartë. Ligji ka disa hapësira. Rasti tregon që gjithë ky system nuk funksionon ashtu si duhet, në fund kthehet në një skemë mashtrimi. Nëse bëjmë një llogaritje, i bie që interesi të jetë 100%. Duhet që Banka e Shqipërisë të vendosë tavane, por edhe të mbikëqyrë. Ka shumë individë që e kanë shlyer këtë kredi dhe ekzistojnë te Banka e Shqipërisë si individë që kanë një hua për të shlyer.”- tha ajo.
Më tej ajo theksoi se ka raste që edhe nga një “overdraft” ka njerëz që kanë mbetur pa shtëpi.
“Individët që i përkasin kësaj shtrese që u mashtrua janë një tragjedi, sepse janë nën nivelin mesatar të të ardhurave.”- u shpreh Radonshiqi.
“Veç këtij raste kemi edhe raste të tjera. Unë di shumë raste edhe nga mikesha të mia që edhe pse kreditë ishin ngrirë për disa muaj gjatë pandemisë, institucioni kishte vendosur aq shumë interesa penaliteti dhe pas një viti i morën në telefon dhe i thanë nuk e ke shlyer. Të gjitha janë raste të skemës së mashtrimit. Janë shumë herë më të dëmshme se fajdet. Një faj shumë i madh është edhe i procedurave të përmbarimit që bëhen palë me mikrokreditë dhe shkojnë deri te sekuestro e pronave. Denoncime ka pasur edhe më herët, por nuk e kuptoj pse ka qenë kjo vëmendje kaq e vonuar.”- tha ekspertja./Radar.al