Drejtori i Përgjithshëm i Policisë së Shtetit, Ilir Proda, vizitoi sot në repartin e djegieve në QSUT Komisar Agim Trocin, Shef i Komisariatit të Policisë Delvinë, i cili u plagos rëndë gjatë përpjekjeve për të shpëtuar disa të moshuar nga flakët në fshatin Vergo.
Proda ndoqi nga afër evakuimin e tij me helikopter dhe u interesua për gjendjen shëndetësore pranë stafit mjekësor, duke e përgëzuar për aktin e guximshëm dhe human.
“Shefi i Komisariatit Agim Troci është shembull i përkushtimit dhe sakrificës në shërbim të jetës së qytetarëve,” deklaroi Proda. Ai falënderoi gjithashtu të gjithë efektivët e Komisariatit të Delvinës dhe Sarandës, që shpëtuan dhjetëra banorë përmes evakuimit nga zonat e përfshira nga flakët në Senicë, Vergo dhe Kopaçëz.
Ndërhyrja e strukturave të Zjarrfikëses, Emergjencës Civile, Policisë dhe Ushtrisë vijon në terren, ndërsa Policia apelon për kujdes të shtuar dhe ndëshkim të zjarrvënies së qëllimshme.