Në fund të ndeshjes së Shpresave mes Shqipërisë dhe Gjermanisë në “Elbasan Arena”, u regjistruan disa momente tensioni mes pankinave të dy skuadrave.
Ngjarja ndodhi pas një goditjeje këndi të akorduar në favor të Gjermanisë në minutat shtesë, vendim që u kontestua nga trajneri shqiptar, Bushi, i cili shpesh dilte jashtë zonës teknike. Ky reagim nuk i pëlqeu homologut të tij gjerman, Antonio Di Salvo, i cili kërkonte vazhdimin normal të ndeshjes.
Pas vërshëllimës përfundimtare, Bushi dhe ish-futbollisti i Bajernit u përplasën gjatë momentit të zakonshëm të përshëndetjeve, duke debatuar para stafit të dy skuadrave. Tefik Osmani ndërhyri menjëherë dhe i ndau, duke shmangur përshkallëzimin e situatës.
Momenti, i kapur në video, ka tërhequr vëmendjen e tifozëve dhe mediave sportive, por nuk pati pasoja serioze për askënd nga të dyja skuadrat.