Tensione dhe përplasje janë regjistruar në sallën e Kuvendit, duke detyruar mazhorancën të ndërpresë diskutimet dhe të kalojë menjëherë në votimin e pikave të rendit të ditës.
Kreu i grupit parlamentar të Partisë Socialiste, Taulant Balla, deklaroi se situata kishte dalë jashtë kontrollit, duke theksuar se deputetët po përballeshin me incidente gjatë ushtrimit të detyrës.
“Pas shumë përpjekjesh për të rivendosur rregullin, deputetët goditen për shkak të detyrës. Në këto kushte propozoj mbylljen e diskutimeve dhe kalimin në votim,” u shpreh ai.
Nga ana tjetër, opozita reagoi me protesta. Deputetët e Partisë Demokratike, përfshirë Flamur Noka dhe Gent Strazimiri, bllokuan sërish foltoren e Kuvendit në shenjë kundërshtimi, përpara se të vendosnin të braktisnin seancën.
Seanca vijoi mes tensioneve, me mazhorancën që miratoi pikat e rendit të ditës pa praninë e opozitës.