Kryeministri Edi Rama zhvilloi sot një takim me kryebashkiakët e vendit, ku në fokus ishin sfidat e bashkive për vitin 2026, sezoni turistik dhe, siç e cilësoi ai, “betejat politike dhe shoqërore” kundër ndotjes nga mbetjet, veçanërisht plastika.
Duke iu referuar përmbytjeve të fundit që prekën disa zona të vendit, Rama tha se, përveç reshjeve intensive dhe rritjes së nivelit të ujit, një faktor kyç ishte ndotja nga mbeturinat dhe problematikat e infrastrukturës mbrojtëse, si kanalet kulluese dhe argjinaturat.
Kryeministri kërkoi ndërhyrje të menjëhershme nga pushteti vendor, si për ndërgjegjësimin e qytetarëve lidhur me hedhjen e mbetjeve, ashtu edhe për mirëmbajtjen e infrastrukturës. Ai theksoi se Ministria e Qeverisjes Vendore do të çojë përpara projektin për blerjen e mjeteve që do të shërbejnë për pastrimin e kanaleve kulluese.
“Kur gjendemi përballë kësaj situate agresioni të mbetjeve plastike, që është drejtpërdrejt ndikim i njeriut, duhet të angazhohemi për një ofensivë të përbashkët dhe të përfshijmë komunitetet për ta vënë nën kontroll këtë faktor të rrezikshëm dhe të dëmshëm,” u shpreh Rama.
Ai paralajmëroi për pasojat e rënda mjedisore, duke theksuar se plastika që përfundon në det shkakton dëme të pariparueshme për jetën detare dhe cilësinë e ushqimit.
“Duhet të bëjmë çmos për ta frenuar këtë lemeri papërgjegjshmërie qytetare. Kjo është punë shqiptare, krim shqiptar. Nuk mund ta vëmë gishtin te turistët e huaj. Për këtë duhet të marrim masa të shpejta,” tha kryeministri.
Rama njoftoi se i ka kërkuar ministrit të Pushtetit Vendor ngritjen e një task-force për hartimin e një plani të përbashkët me tre faza, që do të synojë menaxhimin më efektiv të mbetjeve dhe parandalimin e përmbytjeve.
Ai u ndal edhe te infrastruktura mbrojtëse, duke theksuar se analizat nga kjo emergjencë kanë evidentuar pika me rezistencë të dobët, të cilat kërkojnë ndërhyrje të shpejtë dhe bashkëpunim më të ngushtë mes pushtetit vendor dhe institucioneve qendrore.
Në fund, Rama përmendi propozimin e ministrit Demo për sigurimin e një fondi mbështetës, me qëllim blerjen e një sasie të konsiderueshme mjetesh që do të vihen në shërbim të kullimit dhe pastrimit të kanaleve kryesore.