Përmbytjet e shkaktuara nga dalja nga shtrati e lumit Vjosë kanë goditur rëndë fermerët në zonën e Kafarajt, në njësinë administrative Frakull të Fierit. Rreth 25 hektarë tokë të kultivuar me sera luleshtrydhesh janë përmbytur plotësisht, duke vënë në rrezik serioz jetesën e dhjetëra familjeve.
Sipas fermerëve, niveli i ujit në sera ka arritur deri në dy metra, një situatë e paprecedentë për ta. Dëmet kanë prekur rreth 60 kultivues, në një moment kritik, pasi kultura e luleshtrydhes ndodhet në fazën e prodhimit.
Fermerët shprehen se kjo është një situatë e përsëritur ndër vite dhe se mungesa e dëmshpërblimit i ka lënë të pambrojtur. Ata theksojnë se vetëm në përmbytjet e vitit 2015 kanë marrë një kompensim minimal, rreth 10% të dëmit të shkaktuar, ndërsa në rastet e tjera nuk kanë përfituar asnjë ndihmë.
Të indinjuar, kultivuesit deklarojnë se ndonëse ndodhen në një gjendje katastrofike, asnjë institucion nuk ka shkuar në terren për të verifikuar situatën nga afër. Sipas tyre, dëmet janë të pallogaritshme, pasi ekonomia familjare e zonës mbështetet pothuajse tërësisht te të ardhurat nga kjo kulturë.
“Po përpiqemi të shpëtojmë bimën, por prodhimi është shkatërruar plotësisht”, shprehen fermerët, të cilët njëzëri apelojnë për ndërhyrje urgjente dhe ndihmë nga shteti. Në të kundërt, ata paralajmërojnë se shumë prej tyre rrezikojnë falimentimin.