Reshje të dendura shiu kanë shkaktuar përmbytje masive në Bullgari, duke goditur rëndë rajonin e Burgasit. Ndër zonat më të prekura është fshati turistik Elenite, ku ujërat kanë përfshirë hotele, ndërtesa dhe automjete, duke krijuar një situatë kaotike.
Qindra persona janë evakuuar me urgjencë, ndërsa dhjetëra ekipe shpëtimi po punojnë në terren në kushte shumë të vështira. Deri më tani janë konfirmuar dy viktima: një person që humbi jetën në një garazh nëntokësor dhe një operator ekskavatori që kishte shkuar për të ndihmuar, por u gjet më pas i pajetë.
Shirat e rrëmbyeshëm vazhdojnë të godasin jugun e bregdetit të Zi, duke përkeqësuar situatën. Ndërkohë, gjendje e jashtëzakonshme është shpallur në rrethet Burgas, Montana dhe Pernik.
Shpëtimtarët po kontrollojnë ndërtesat për persona të bllokuar. Deri tani janë evakuuar gjashtë gra, përfshirë tre turiste polake, nga një resort në komunën e Nesebrit.
Për shkak të nivelit të lartë të ujërave, shumë rrugë janë bllokuar dhe automjetet e zakonshme nuk mund të hyjnë në zonat e prekura. Në operacion janë angazhuar ekipe të specializuara me zhytës dhe mjete amfibe nga qytetet Nesebër, Pomorie dhe Varna.
Rreth 50 persona të izoluar në katet e sipërme të ndërtesave të rrezikuara janë aktualisht jashtë rrezikut. Autoritetet paralajmërojnë se reshjet pritet të vijojnë edhe në orët në vijim.