Një përleshje e ashpër mes dy grupeve të rinjsh shqiptarë ka tronditur qendrën e Athinës, duke lënë pas 26 persona të përfshirë dhe të arrestuar, si dhe tre të plagosur rëndë me thikë.
Sipas autoriteteve greke, incidentet ndodhën në zonën e Kato Patisias, ku dy grupet u përplasën në dy episode të ndryshme. Të plagosurit morën goditje me thikë në pjesën e gjoksit, pranë zemrës, dhe ndodhen në gjendje të rëndë në spital.
Policia greke bëri të ditur se të dy grupet vepronin me një organizim të strukturuar dhe disiplinë të konsiderueshme. Në operacionin e zhvilluar nga Siguria e Athinës u arrestuan gjithsej 26 persona.
Përleshja e parë është regjistruar më 21 dhjetor 2025, ndërsa pamjet filmike tregojnë momentin kur një grup sulmon me mjete prerëse dy persona, në sy të kalimtarëve të shumtë që ndodheshin në zonë.
Disa ditë më vonë, një incident i dytë u shënua në të njëjtën zonë, duke përshkallëzuar konfliktin mes palëve.
Fillimisht, të arrestuarit kanë deklaruar se shkak i konfliktit ishte një vajzë. Megjithatë, hetimet kanë nxjerrë në pah dyshime të forta se përplasja mund të ketë lidhje me kontrollin e trafikut të drogës, pas sekuestrimeve të kryera në banesat e tyre.
Gjatë kontrolleve policore u sekuestruan:
97 gramë kanabis
52 gramë kokainë
51 gramë metamfetaminë
6 thika
një peshore elektronike precize
Hetimet vijojnë për zbardhjen e plotë të rrethanave të ngjarjes.