Kryetari i Kuvendit, Niko Peleshi, ka reaguar pas incidenteve të regjistruara gjatë protestës së mbajtur këtë të enjte përpara Parlamentit, ku u shënuan përplasje mes protestuesve dhe forcave të Policisë së Shtetit. Si pasojë e tensioneve, pati persona të shoqëruar dhe të lënduar, mes tyre edhe efektivë policie.
Përmes një reagimi në rrjetet sociale, Peleshi dënoi çdo akt dhune të ushtruar ndaj punonjësve të Policisë së Shtetit, deputetëve dhe institucioneve publike, duke theksuar se e drejta për të protestuar është një nga të drejtat themelore, por duhet të ushtrohet në mënyrë paqësore dhe në përputhje me ligjin.
Ai u shpreh se dhuna dhe përplasjet nuk kontribuojnë në forcimin e demokracisë, por cenojnë sigurinë e qytetarëve dhe institucionet e shtetit. Sipas tij, Shqipëria duhet të ecë përpara përmes dialogut, respektimit të ligjit dhe funksionimit të institucioneve.
Në përfundim të reagimit, Peleshi shprehu solidaritet me efektivët e Policisë së Shtetit të lënduar gjatë kryerjes së detyrës, u uroi atyre shërim të shpejtë dhe e cilësoi të papranueshme çdo sulm ndaj deputetëve të Kuvendit.