Edvin Kulluri, ish-kandidat i Djathtas për Qarkun e Vlorës, deklaroi se Partia Demokratike ka nevojë për një shkundje të fortë, duke i bërë thirrje figurave si Ervin Salianji, Jorida Tabaku dhe Ilir Alimehmeti të nisin një debat për ndryshim në krye të partisë, e jo vetëm për funksione të dyta si ato të nënkryetarëve.
Sipas Kullurit, tre politikanët përmendur nuk kanë pse të kandidojnë vetë për kryetar, por mund të gjejnë një figurë përbashkuese për ta përballur me Sali Berishën, të cilin ai e cilëson si pengesë për ringritjen e opozitës.
“PD aktuale është e masakruar. Ajo që duhet është një ndryshim rrënjësor, një alternativë e vërtetë. Jo një dishepull i Berishës në krye, sepse atëherë gjendja vetëm do përkeqësohet,” – u shpreh Kulluri.
Ai vlerësoi sakrificën personale të Salianjit, që qëndroi 8 muaj në burg, duke thënë se kjo i jep legjitimitet moral për të marrë përgjegjësi politike. Sipas tij, nëse Salianji, Alimehemeti apo Tabaku, pas gjithë presionit publik, mjaftohen me poste nënkryetarësh, “aksionet e tyre bien dhe sakrifica e tyre bëhet zero”.
“Këta të tre kanë më shumë legjitimitet se kushdo tjetër në PD. Nëse nuk e thyejnë murin e betonit që e mban PD-në jashtë pushtetit, atëherë nuk kanë bërë asgjë. Dhe ky mur, siç e quaj unë, është Berisha – jo si individ, por si frymë e konsumuar,” – shtoi ai.
Kulluri përmendi gjithashtu nevojën për një platformë të mirëfilltë që të ndihmojë në bashkimin e opozitës dhe ringritjen e Partisë Demokratike si alternativë qeverisëse.