Presidenti Bajram Begaj ka reaguar pas nismës së Partisë Demokratike për fillimin e procedurës parlamentare për shkarkimin e tij nga detyra.
Në deklaratën e Presidencës thuhet se Kreu i Shtetit nuk komenton nisma politike, duke theksuar se mandatin presidencial e ushtron “pa u ndikuar nga sulmet për interesa politike apo nga fabrikimi i të pavërtetave për konsum publik”.
Begaj thekson se respekton institucionet kushtetuese, përfshirë edhe Parlamentin, të cilin e cilëson “të lirë dhe sovran për të ushtruar procedurën e shkarkimit sa herë e gjykon të përligjur”.
Ai shton se është i gatshëm t’i përgjigjet Kuvendit me seriozitet, ndërsa i bën thirrje deputetëve që të hetojnë me profesionalizëm dhe transparencë pretendimet e ngritura nga PD, të cilat i quan “të pabazuara në fakte”.
Reagimi i Presidentit Bajram Begaj
Publiku është njohur sot me një nismë të Partisë Demokratike për fillimin e procedurës parlamentare për shkarkimin nga detyra të Presidentit të Republikës. Presidenti i Republikës nuk komenton nismat politike të asnjerës palë, sepse një gjë e tillë nuk përputhet me neutralitetin e funksionit të lartë kushtetuese. Ai ka zgjedhur të ushtrojë mandatin presidencial, i pa ndikuar në asnjë rrethanë nga sulmet për interesa politike, apo nga fabrikimi i të pavërtetave për konsum publik.
Presidenti i Republikës respekton të gjitha institucionet e tjera kushtetuese, edhe kur ato marrin pozicione të kundërta me pozicionet që mban Presidenti i Republikës në ushtrim të detyrës së tij kushtetuese. Procedura për shkarkimin e Presidentit të Republikës nga detyra është instrument kushtetues i Parlamentit. Parlamenti është i lirë dhe sovran ta ushtrojë sa herë që e gjykon të përligjur.
Presidenti i Republikës ndjehet i obliguar t’i përgjigjet parlamentit me gjithë seriozitetin dhe ndershmërinë që imponon kjo procedurë. Grupi parlamentar i Partisë Demokratike ka promovuar sot nismën e tij duke publikuar pretendime rreth fakteve që nuk janë të vërteta. Presidenti i Republikës pret që Parlamenti të hetojë rreth tyre me profesionalizëm dhe transparencë të plotë. Kjo nuk duhet bërë si obligim ndaj postit të lartë të Kreut të Shtetit por si detyrim ndaj të vërtetës dhe interesit të publikut.