Pas tensioneve në seancën plenare për miratimin e programit qeverisës dhe kabinetit të ri, Grupi Parlamentar i Partisë Demokratike i është drejtuar me një letër zyrtare Trupit Diplomatik të akredituar në Shqipëri, duke denoncuar një situatë që e konsideron “të paprecedentë dhe antikushtetuese”.
Sipas PD-së, Kryeministri Edi Rama dhe Kryetari i Kuvendit penguan qëllimisht debatet parlamentare, duke orkestruar seancën në një mënyrë që, sipas opozitës, minimizoi rolin e saj dhe cenoi funksionimin demokratik të Kuvendit.
Letra, e firmosur nga kryetari i Grupit Parlamentar të PD-së, Gazment Bardhi, thekson se debati u ndërpre për herë të parë në 35 vite pluralizëm, ndërsa Kryeministri Rama ndërpreu fjalën e tij për të transmetuar një video nga figura virtuale e quajtur “Ministrja e Inteligjencës Artificiale Diella”, veprim që PD e konsideron si propagandistik dhe i paprecedentë.
Opozita akuzon gjithashtu Kryetarin e Kuvendit për zbatim të dyfishtë të standardeve procedurale, duke i mohuar të drejtën për të folur kreut të Grupit të PD-së dhe duke i dhënë të njëjtën të drejtë dy herë përfaqësuesit të shumicës.
PD thekson se mbyllja e seancës pa debat real përbën shkelje të nenit 97 të Kushtetutës dhe nenit 110 të Rregullores së Kuvendit, duke paralajmëruar se kjo po e kthen Kuvendin në një zgjatim të Këshillit të Ministrave, pa kontroll mbi qeverinë dhe ligjet.
Në përfundim, opozita i bën thirrje trupit diplomatik të ndjekë me kujdes zhvillimet, të cilat sipas saj rrezikojnë seriozisht demokracinë parlamentare dhe rendin kushtetues në Shqipëri.