Një studim afatgjatë norvegjez, që përfshiu mijëra të rritur përgjatë 20 viteve, ngre alarmin për ndikimin e produkteve të pastrimit në shëndetin e mushkërive – veçanërisht tek gratë. Sipas studiuesve, përdorimi i shpeshtë i sprejve dhe kimikateve agresive në ambiente të mbyllura çon në dëmtime të përhershme të rrugëve të frymëmarrjes, përkeqësim të funksionit pulmonar dhe rritje të rrezikut për astmë, efekte që krahasohen me ato të pirjes së duhanit.
Gratë, më të ekspozuara dhe më të ndjeshme
Sipas të dhënave të studimit, dëmtimi i mushkërive u vu re dukshëm tek gratë, por jo tek burrat, çka lidhet me ekspozimin më të shpeshtë të grave ndaj produkteve të pastrimit, por edhe me faktorë biologjikë e hormonalë.
Produktet në fjalë përmbajnë substanca si amoniaku, klori, etanolamina apo komponime të amonit kuaternar – përbërës që mund të shkaktojnë inflamacion të rrugëve të frymëmarrjes, dëmtime qelizore dhe reaksione alergjike.
Zgjidhjet: më shumë ajrim, më pak kimikate
Ekspertët këshillojnë zëvendësimin e produkteve kimike me alternativa natyrale si uthulla, soda e bukës dhe detergjentët ekologjikë. Gjithashtu, theksohet rëndësia e ajrimit të hapësirave gjatë dhe pas pastrimit dhe përdorimi i maskave kur përdoren produkte të forta.
Përtej kujdesit individual, studiuesit u bëjnë thirrje edhe prodhuesve që të jenë më transparentë me etiketat dhe të kufizojnë përbërësit e dëmshëm.
“Pastrimi nuk duhet të jetë një kërcënim për shëndetin”, përfundon raporti, duke e kthyer këtë çështje në një prioritet shëndetësor jo vetëm për gratë, por për të gjithë ata që jetojnë apo punojnë në ambiente të mbyllura.