Megjithë përpjekjet e qeverisë britanike për të kontrolluar fluksin e emigrantëve, ka një rritje të vazhdueshme të numrit të individëve që tentojnë të kalojnë Kanalin.
Kryeministri britanik Starmer po përpiqet të forcojë bashkëpunimin e sigurisë me vendet e tjera europiane për të luftuar krimin e organizuar që ndihmon në emigracionin ilegal.
Një nga strategjitë e përfolura për të përmirësuar situatën ka qenë dërgimi i emigrantëve në Shqipëri, për të cilën Starmer është interesuar gjatë një takimi me homologen italiane, Giorgia Meloni.
Gazetari Kujtim Vani, përmes një komunikimi të drejtpërdrejtë nga Londra në studion e News24 ka folur mbi situatën në Britaninë e Madhe për emigracionin ilegal dhe masat që pritet të ndërmerren nga kryeministri Kier Starmer.
Ai theksoi se raportet sugjerojnë se Britania e Madhe është e interesuar të adoptojë një qasje të ngjashme me atë të Italisë, duke përdorur Shqipërinë si një vend të mundshëm për të ndihmuar në menaxhimin e flukseve të emigrantëve dhe për të parandaluar kalimet e paligjshme nëpërmjet kanalit.
“Italia ka parë një rënie të emigracionit të parregullt gjatë vitit të kaluar përmes detit. Kryeministri britanik ka zhvilluar një takim me homologen Meloni, duke diskutuar mënyrat se si ka funksionuar kjo rënie. Nga kjo kanë lindur zërat për një interesim të Britanisë për përdorimin e Shqipërisë në të njëjtën mënyrë si Italia”, u shpreh Vani.
Me marrëveshjen e nënshkruar në Shëngjin, migrantët që do të shpëtohen në Detin Mesdhe, do të strehohen në Shqipëri, ndërsa Italia do të financojë për ngritjen e qendrave për pritjen e tyre.
Kryeministrja italiane, Giorgia Meloni, dhe kryeministri i Shqipërisë, Edi Rama, thanë se kanë rënë dakord që të strehojnë përkohësisht në Shqipëri mijëra migrantë që kërkojnë azil në Itali.
Në bazë të marrëveshjes, nëse Italia i refuzon kërkesat për azil, Shqipëria më pas do t’i dëbojë migrantët.
Fëmijët dhe gratë shtatzëna do të përjashtohen nga marrëveshja.