Parlamenti Europian votoi të martën për heqjen e imunitetit të eurodeputetit italian të qendrës së djathtë Fulvio Martusciello, duke i hapur rrugë autoriteteve belge të vijojnë hetimet ndaj tij në kuadër të skandalit që lidhet me gjigantin kinez të teknologjisë Huawei.
Vendimi u mor me votim të fshehtë në Strasburg dhe i jep mundësi Prokurorisë belge të hetojë dyshimet për korrupsion që lidhen me aktivitetin lobues të kompanisë kineze në institucionet europiane.
Pak para votimit, Martusciello u shpërndau eurodeputetëve një dokument ku kundërshtonte akuzat e ngritura ndaj tij. Sipas tij, pretendimet e prokurorëve belgë janë ndërtuar mbi vlerësime të nxituara dhe sipërfaqësore.
Eurodeputeti italian mohoi çdo shkelje dhe këmbënguli se transfertat bankare që hetuesit dyshojnë se lidhen me Huawei nuk kanë asnjë lidhje me kompaninë kineze.
Sipas tij, bëhet fjalë për para që i ishin kthyer nga një mik, pasi më herët i kishte dhënë një hua.
Hetimi belg është hapur që në mars të vitit 2025 dhe po shqyrton dyshime për korrupsion aktiv, falsifikim dokumentesh dhe pastrim parash brenda Parlamentit Europian.
Prokurorët dyshojnë se aktivitetet e supozuara të ryshfetit mund të kenë shërbyer për të favorizuar interesat e Huawei në institucionet europiane.
Kompania kineze i ka mohuar vazhdimisht akuzat. Ndërkohë, Parlamenti Europian nuk pranoi kërkesat për heqjen e imunitetit të tre eurodeputetëve të tjerë: maltezit Daniel Attard, italianit Salvatore De Meo dhe eurodeputetit bullgar Nikola Minçev.
Ligjvënësit ndoqën rekomandimin e Komisionit për Çështjet Ligjore të Parlamentit Europian, i cili vlerësoi se autoritetet belge nuk kishin paraqitur prova të mjaftueshme për të justifikuar hapjen e një hetimi ndaj tyre.
Votimi u zhvillua në një klimë pakënaqësie mes një pjese të eurodeputetëve ndaj mënyrës se si po menaxhohet hetimi nga autoritetet belge.
Sipas raportimeve, disa ligjvënës kanë ngritur shqetësime për gabime procedurale gjatë hetimeve, përfshirë raste kur hetuesit kanë ngatërruar një eurodeputet me një biznesmen që kishte të njëjtin emër, si dhe një tjetër rast kur u kërkua heqja e imunitetit të një personi që nuk ishte eurodeputet në kohën kur dyshohet se kishte ndodhur ngjarja nën hetim.