Eurodeputetët miratuan të mërkurën një rezolutë me shumicë dërrmuese, që propozon kufizimin e përdorimit të mediave sociale për fëmijët nën 16 vjeç.
Sipas Parlamentit Europian, kjo masë synon të ndihmojë prindërit dhe familjet në përballimin e rreziqeve të shumta që vijnë nga përdorimi i pakufizuar i platformave online, të cilat mund të shkaktojnë varësi dhe efekte negative në shëndetin mendor të të rinjve.
Megjithëse rezoluta nuk ka fuqi ligjore, ajo ushtron presion mbi institucionet e Bashkimit Europian për të përgatitur dhe miratuar ligjshmëri konkrete që do të kufizojë aksesin e të miturve në rrjetet sociale.
Debati për kufizimin e moshës erdhi pas alarmit në rritje lidhur me ndikimet negative të internetit dhe përdorimit të tepruar të teknologjisë digjitale tek fëmijët dhe adoleshentët, duke përfshirë probleme të shëndetit mendor, izolim social dhe ekspozim ndaj përmbajtjeve të papërshtatshme.
Parlamenti Europian theksoi se përdorimi i rrjeteve sociale duhet të shoqërohet me përgjegjësi dhe ndërgjegjësim për rreziqet që mund të hasin përdoruesit e rinj.