Rregullat për parkimin në Shqipëri po bëhen më të rrepta dhe shkeljet nuk do të ndëshkohen më vetëm me gjobë. Drejtuesit që lënë mjetin në mënyrë të gabuar rrezikojnë tashmë edhe burgun.
Shefi i edukimit pranë Policisë Rrugore, Ali Yzeiri, deklaroi në News24 se qëndrimi i përkohshëm i mjetit nuk duhet të keqinterpretohet nga qytetarët.
“Lejohet vetëm për të marrë apo zbritur pasagjerë, pa u larguar nga makina. Drejtuesi duhet të jetë gjithmonë i gatshëm të lëvizë menjëherë, nëse pengon qarkullimin,” u shpreh ai.
Yzeiri paralajmëroi se, në raste të përsëritura apo të rrezikshme, si bllokimi i ambulancave, zjarrfikësve apo mjeteve të policisë, penalizimet mund të përfshijnë edhe ndalimin e lirisë.
Këto masa synojnë të rrisin disiplinën në trafik, të shmangin kaosin rrugor dhe të garantojnë sigurinë e qytetarëve.