Përdorimi i paracetamolit gjatë shtatzënisë nuk lidhet me rritjen e rrezikut për autizëm apo çrregullimin e hiperaktivitetit me mungesë vëmendjeje (ADHD) tek fëmijët, konfirmojnë provat më të fundit shkencore. Ky është përfundimi i një shqyrtimi të gjerë studimesh, të publikuar në revistën prestigjioze “The Lancet”.
Debati u rindez në shtator, kur presidenti i SHBA-së, Donald Trump, deklaroi se kishte pasur një “rritje meteorike” të rasteve të autizmit dhe sugjeroi se përdorimi i “Tylenol” (paracetamol) gjatë shtatzënisë mund të ishte një nga shkaqet. Ai këshilloi që ky qetësues dhimbjesh të mos përdorej nga gratë shtatzëna, deklarata që u kundërshtua gjerësisht nga shkencëtarë dhe organizata që merren me autizmin në Britaninë e Madhe dhe më gjerë.
Ekspertët shpresojnë se studimi i ri do t’i japë fund këtij debati. Hulumtimi u botua në “The Lancet Obstetrics, Gynaecology and Women’s Health” dhe u realizua nga një ekip ndërkombëtar akademikësh, përfshirë specialistë nga Britania e Madhe.
Studiuesit analizuan të gjitha kërkimet ekzistuese që vlerësonin lidhjen mes përdorimit të paracetamolit gjatë shtatzënisë dhe rrezikut për autizëm, ADHD apo aftësi të kufizuara intelektuale. Në shqyrtim u përfshinë 43 studime në një analizë sistematike dhe 17 studime në një meta-analizë, që kombinon të dhënat nga studime të shumta për të nxjerrë përfundime më të qëndrueshme.
Një vëmendje e veçantë iu kushtua edhe studimeve të ashtuquajtura “krahasim mes vëllezërve dhe motrave”, ku u analizuan fëmijë të lindur nga e njëjta nënë në shtatzëni të ndryshme – njëra me përdorim paracetamoli dhe tjetra pa të. Studiuesit morën parasysh gjithashtu sëmundjet e nënave dhe trajtimet e tjera mjekësore që ato kishin ndjekur.
Në përfundim, autorët theksuan se nuk u gjet asnjë lidhje midis ekspozimit ndaj paracetamolit gjatë shtatzënisë dhe rrezikut për çrregullimin e spektrit të autizmit, ADHD-në apo aftësitë e kufizuara intelektuale tek fëmijët.