Presidenti amerikan Donald Trump ka bërë të ditur se ka zhvilluar një telefonatë që e ka cilësuar si “të mirë dhe shumë produktive” me presidentin rus Vladimir Putin, pak përpara takimit të planifikuar me presidentin ukrainas Volodymyr Zelensky.
Përmes një postimi në rrjetin Truth Social, Trump njoftoi se takimi me Zelenskyn do të mbahet në sallën kryesore të ngrënies në rezidencën e tij Mar-a-Lago, ndërsa gazetarët janë ftuar të jenë të pranishëm. Kremlini ka konfirmuar gjithashtu zhvillimin e bisedës telefonike mes dy liderëve.
Në një reagim tjetër, Trump ka vlerësuar rolin e administratës së tij si ndërmjetëse në konfliktet globale, duke përmendur një armëpushim të arritur mes Kamboxhias dhe Tajlandës, si dhe duke kritikuar Kombet e Bashkuara për mungesë efektiviteti në zgjidhjen e konflikteve, përfshirë luftën në Ukrainë. “Ndoshta Shtetet e Bashkuara janë bërë Kombet e Bashkuara të vërteta”, ka shkruar ai.
Telefonata me Putinin vjen vetëm disa orë para takimit me Zelenskyn, ku presidenti ukrainas pritet të kërkojë mbështetjen e Trump për një plan të ri 20-pikësh që synon t’i japë fund luftës gati katërvjeçare me Rusinë. Ky plan, i hartuar pas javësh negociatash intensive mes SHBA-së dhe Ukrainës, ende nuk ka marrë miratimin e Moskës.
Takimi në Florida zhvillohet në një moment delikat, pas një sulmi të madh rus me raketa dhe dronë ndaj Kievit. Sipas Shtëpisë së Bardhë, ky do të jetë takimi i parë ballë për ballë mes Trump dhe Zelenskyt që nga tetori, kur presidenti amerikan kishte refuzuar kërkesën e Kievit për raketa Tomahawk me rreze të gjatë veprimi.