Kriza në Lindjen e Mesme ka njohur një tjetër përshkallëzim dramatik, pasi Irani ka ndërmarrë një sulm të drejtpërdrejtë me raketa ndaj bazave ushtarake amerikane në Katar dhe Irak. Lajmi u konfirmua nga agjencia iraniane Tasnim, e cila raportoi se operacioni mban emrin “Shpallja e fitores”.
Sipas burimeve ushtarake të cituara nga Reuters, sistemet e mbrojtjes ajrore janë aktivizuar në bazën ajrore Ain al Asad në Irak, ndërsa objektiv tjetër i raketave iraniane është baza Al Udeid në Katar — instalimi më i madh ushtarak amerikan në rajon.
Irani kishte paralajmëruar hakmarrje pas sulmeve ajrore të fundjavës, ku SHBA shkatërroi disa nga objektet bërthamore iraniane. Zyrtarë amerikanë kishin vlerësuar më herët se rreziku për sulme hakmarrëse ishte “shumë i besueshëm”.
Dy zyrtarë të njohur me zhvillimet thanë për CNN dhe BBC se SHBA-të po gjurmojnë në kohë reale disa raketa të lëshuara nga Irani drejt bazave në Katar dhe Irak. Gjithashtu, burime diplomatike raportojnë se Qendra e Operacioneve Ajrore të Koalicionit, e vendosur në Al Udeid, është aktualisht nën nivelin më të lartë të alarmit.
Nga Uashingtoni, një zyrtar i Shtëpisë së Bardhë konfirmoi se Presidenti Donald Trump, Sekretari i Mbrojtjes Pete Hegseth dhe Shefi i Shtabit të Përbashkët Dan Caine ndodhen në Dhomën e Situatave, duke ndjekur zhvillimet në kohë reale.
Baza Al Udeid, e vizituar nga vetë Presidenti Trump vetëm pak javë më parë, strehon mbi 10 mijë trupa amerikane dhe është thelbësore për operacionet ushtarake në gjithë Lindjen e Mesme.
Kjo goditje e drejtpërdrejtë ndaj forcave amerikane shënon një përshkallëzim të ndjeshëm të konfliktit, me implikime të rënda për stabilitetin rajonal dhe për të ardhmen e marrëdhënieve SHBA-Iran.