Përgatitjet për edicionin e ri të Festivalit të RTSH kanë hyrë në fazën përfundimtare dhe, pas javësh debatash dhe negociatash, është vendosur përfundimisht emri i moderatores: Arilena Ara do të ngjitet në skenën e Pallatit të Kongreseve për të udhëhequr katër netët e festivalit.
Prezantimi i Arilenës ka ardhur pas një sërë peripecish. RTSH prej kohësh përballet me vështirësi ekonomike, çka ka krijuar mospërputhje mes buxhetit të festivalit dhe tarifave të larta të moderatores. Organizatorët fillimisht kanë propozuar Salsano Rrapin si drejtues kryesor, i shoqëruar nga një moderatore tjetër, për të shmangur kosto të larta.
Nga ana tjetër, drejtuesit e RTSH preferuan që kërcënestin t’ia besonin figurave të brendshme të televizionit publik, si Fjodora Fjora apo Flori Gjini, për shkak të tarifave më të ulëta. Për moderimin krah tyre u diskutua edhe emri i Jonida Shehut, por “era e re e festivalit” e shtyu organizimin drejt një figure më të re në moshë — Arilena Ara.
Sipas burimeve, këngëtarja ka kërkuar pagesë të lartë, por pavarësisht kostos, palët kanë arritur marrëveshjen dhe Arilena është konfirmuar si drejtuesja kryesore e këtij edicioni. Shuma që ajo do të përfitojë mbetet ende e paqartë, por njihet fakti se tarifat e saj janë ndër më të lartat në treg.
Ndërkohë, ende nuk është përcaktuar se kush do ta shoqërojë Arilenën në skenë. Burime brenda RTSH bëjnë me dije se negociatat me Salsano Rrapin janë drejt përfundimit dhe ai pritet të formojë një dyshe të re prezantimi me këngëtaren.
Më herët, në garë për moderimin kishin qenë edhe Arbana Osmani dhe Luana Vjollca, të cilat dorëzuan një projekt të përbashkët, por propozimi i tyre u refuzua nga RTSH, duke i përjashtuar të dyja nga drejtimi i këtij edicioni.
Megjithëse festivali nis pas më pak se një muaji, dilemat financiare dhe diskutimet e shumta brenda institucionit vonuan vendimin final — i cili tashmë është marrë: Arilena Ara do të jetë në krye të Festivalit të 63-të të RTSH.