Prej më shumë se pesë ditësh, banorët dhe pushuesit në një kompleks pallatesh në zonën turistike të Golemit po përballen me mungesën e ujit të pijshëm, duke përjetuar një situatë alarmante në kulmin e sezonit veror.
Rritja e ndërtimeve dhe fluksi i vizitorëve kanë rritur ndjeshëm kërkesën për ujë, ndërkohë që banorët shprehen të neglizhuar, duke akuzuar autoritetet për favorizim të hoteleve në shpërndarjen e ujit. Të zhgënjyer, disa prej tyre po detyrohen të përdorin metoda të pasigurta për sigurimin e ujit të përditshëm.
Në reagimin e saj, Shoqëria Ujësjellës-Kanalizime Durrës bën me dije se defekti është lokal dhe buron nga amortizimi i linjave të vjetra të furnizimit. Sipas saj, ekipe teknike janë në terren për të bërë ndërhyrjet e nevojshme.
Ndërkohë, banorët kërkojnë zgjidhje të menjëhershme përpara se kriza të thellohet, duke e cilësuar situatën si një sfidë serioze për turizmin dhe jetën normale në zonë.