Dhjetëra punonjës të kompanisë së sigurimit të Bankers Petroleum dolën paraditen e sotme në protestë, duke kërkuar një zgjidhje të menjëhershme për situatën e tyre financiare. Sipas protestuesve, 120 punonjës nuk kanë marrë pagat prej shtatë muajsh.
Ata raportojnë se kompania kishte më parë rreth 380 të punësuar, por muajt e fundit janë kryer shkurtime të vazhdueshme, duke lënë punonjësit e mbetur të përballen me vonesa të gjata pagash dhe pasiguri për të ardhmen.
Shumë prej tyre ndodhen në vështirësi ekonomike, duke qenë të zhytur në borxhe dhe kredi, për shkak të mungesës së mundësisë për të përballuar shpenzimet bazë familjare. Protestuesit paralajmërojnë se do të vazhdojnë të organizojnë protesta edhe gjatë punës, derisa kompania të adresojë kërkesat e tyre dhe të paguajë detyrimet.