Në kuadër të operacionit ndërkombëtar “Ura”, ku janë lëshuar 26 urdhër-arreste, në kërkim është edhe Redi Tusha, i cili rezulton të jetë vëllai i Ervis Tushës, truprojës së ish-kryeministrit Sali Berisha.
Redi Tusha është i dyshuar për trafik droge, ndërsa autoritetet italiane kanë vendosur ndaj tij masën “arrest në burg”. Sipas hetimeve, ai ka luajtur një rol kyç në kontrabandimin e 5.5 kilogramëve heroinë të pastër, e njohur si “banana”, nga Shqipëria drejt Italisë.
Dosja përmban detaje të bashkëpunimit kriminal mes një grupi që operonte në disa vende, ku Redi Tusha, në koordinim me të tjerë si Gertin Aliu, Leonard Shakaj, dhe disa trafikantë italianë, organizonin dhe monitoronin dërgesat e drogës në provincën e Barit.
Ervis Tusha, vëllai i Redit, është një figurë e njohur si truprojë e Sali Berishës, të cilin e shoqëron në tubime dhe protesta, pas largimit nga Garda në vitin 2019.
Operacioni “Ura” hedh dritë mbi rrjetet e trafikut ndërkombëtar të drogës dhe rolin që figura të ndryshme kanë pasur në trafikimin e lëndëve narkotike drejt Evropës.