Ministri i Brendshëm, Besfort Lamallari, ka reaguar pas evidentimit të një automjeti që qarkullonte me shpejtësi 212 km/h në aksin rrugor Lushnjë-Fier, ku kufiri maksimal i lejuar është 90 km/h.
Përmes një postimi në rrjetet sociale, Lamallari e cilësoi këtë shkelje si një rrezik të rëndë për jetën e përdoruesve të rrugës, duke theksuar se tejkalimi ekstrem i shpejtësisë nuk mund të konsiderohet një gabim i zakonshëm.
“Me 212 km/h në rrugën Lushnjë-Fier, ku shpejtësia maksimale e lejuar është 90 km/h, nuk është thjesht një ‘gabim’, por një atentat ndaj jetës dhe kërcënim për përdoruesit e tjerë të rrugës”, shkroi ministri.
Lamallari theksoi se Policia e Shtetit po përdor teknologji inteligjente në akset kryesore rrugore për të identifikuar dhe ndëshkuar shkeljet e rënda të Kodit Rrugor.
“Syrin e pagabueshëm të teknologjisë nuk mund ta shmangni”, u shpreh ai, duke u bërë apel drejtuesve të mjeteve të respektojnë kufijtë e shpejtësisë dhe rregullat e qarkullimit rrugor, me qëllim parandalimin e aksidenteve dhe mbrojtjen e jetës së qytetarëve.