Policia Kufitare e Morinës, në bashkëpunim me autoritetet doganore, ka goditur një rast të tentativës për kontrabandim mallrash drejt Kosovës, me një vlerë totale që kap mbi 500 mijë euro.
Gjatë operacionit të koduar “Tarifa”, u arrestuan në flagrancë shtetasit B. L. (52 vjeç) dhe F. M. (55 vjeç), të dy banues në Kukës, pasi në automjetet e tyre u gjet një sasi e madhe mallrash të ndaluara për kalim pa deklarim doganor.
Në automjetin tip Volkswagen, që drejtohej nga F. M., policia gjeti 1006 kuti me medikamente, 41 000 tableta dhe 2 194 celularë, ndërsa në furgonin e drejtuar nga B. L. u zbuluan 62 thasë me duhan, me peshë totale 930 kilogramë.
Mallrat, me vlerë të përllogaritur rreth 54.350.000 lekë, si dhe dy automjetet e përdorura për transport, u sekuestruan në cilësinë e provës materiale.
Dy të arrestuarit do të përballen me akuzat për “Kontrabandë me mallra që paguhet akcizë” dhe “Kontrabandë me mallra të tjera”, ndërsa hetimet po vijojnë nën drejtimin e Prokurorisë së Kukësit për të zbuluar të tjerë persona të përfshirë në rrjetin e kontrabandës.