Një operacion antidrogë i zhvilluar në Stamboll ka çuar në arrestimin e tetë personave, mes të cilëve edhe aktorja e njohur turke, 37-vjeçarja Ezgi Eyüboğlu. Aksioni policor ka përfshirë gjithashtu emra nga bota e menaxhimit dhe e artit.
Aktorja Eyüboğlu dhe menaxheri i saj, Eser Küçükerol, u ndaluan nga policia dhe, së bashku me personat e tjerë të dyshuar, iu nënshtruan analizave mjeko-ligjore në Institutin e Mjekësisë Ligjore.
Pas publikimit të lajmit, avokati i aktores reagoi duke mohuar çdo përfshirje të saj në veprimtari të paligjshme. Sipas tij, Eyüboğlu ndodhej rastësisht në banesën e menaxherit të saj në momentin e ndërhyrjes së policisë dhe nuk kishte dijeni apo lidhje me objektin e hetimit.
Sipas raportimeve të medias turke Habertürk, Eser Küçükerol dhe İsmail Ahmet Akçay u arrestuan me akuzat për “Prodhim dhe trafikim të substancave narkotike ose stimuluese”. Ndaj Ezgi Eyüboğlu u ngritën akuza për “Blerje, posedim ose përdorim të substancave narkotike”. Ndërkohë, Yiğit Macit, Mehmet Ali Gül, Gizem Türedi dhe Mehmet Güçlü akuzohen për “Nxitje dhe lehtësim të prostitucionit”, ndërsa Saim Macit për “Shkelje të ligjit për armët e zjarrit”.
Gjatë bastisjeve në banesa, policia sekuestroi armë zjarri, municion, tableta qetësuese, substanca të dyshuara narkotike, lëngje që dyshohet se përmbajnë drogë, pajisje për përdorimin e saj, si dhe kartëmonedha të dyshuara të falsifikuara.
Ndërkohë, këngëtarja Aleyna Tilki, aktorja İrem Sak dhe influencueset Danla Bilic dhe Mümmine Senna Yıldız, të ndaluara më herët në një operacion tjetër që synonte persona publikë, u liruan në mbrëmje.