OpenAI, kompania pas ChatGPT, ka shpallur një pozicion të ri me pagë vjetore prej 555,000 dollarësh, i njohur si “drejtor i përgatitjes” (Head of Preparedness), duke e cilësuar këtë rol si një nga më sfiduesit në industrinë e inteligjencës artificiale.
Personi që do të marrë këtë detyrë do të jetë përgjegjës për mbrojtjen nga rreziqet e inteligjencës artificiale, përfshirë ndikimet në shëndetin mendor, sigurinë kibernetike dhe potencialin e përdorimit të teknologjisë për armë biologjike. Sam Altman e përshkroi rolin si “kritik” dhe paralajmëroi se kandidati do të hidhet “menjëherë në thellësi”, duke e quajtur sfidën si një nga më të vështirat në botë.
Pozicioni kërkon vlerësimin dhe zbutjen e kërcënimeve të avancuara, duke monitoruar sistemet që mund të krijojnë rreziqe të reja për njerëzimin. Ekspertë të fushës, si Mustafa Suleyman i Microsoft AI dhe Demis Hassabis i Google DeepMind, kanë paralajmëruar për rreziqet e sistemëve të avancuar që mund të veprojnë jashtë kontrollit njerëzor.
Shpallja e OpenAI vjen në një kohë kur sektori i inteligjencës artificiale mbetet kryesisht i vetërregulluar, ndërsa debatet mbi ndikimet e mundshme shoqërore, ligjore dhe etike intensifikohen. Sam Altman tha se kompania po përpiqet të kuptojë më mirë se si të kufizojë pasojat negative të teknologjisë, pa humbur përfitimet që ajo ofron.
Roli përfshin gjithashtu aksione në OpenAI, kompani e vlerësuar rreth 500 miliardë dollarë, dhe sfidat e tij shihen si jashtëzakonisht intensive, duke e bërë këtë “punën më të frikshme në botë” sipas vlerësimeve të ekspertëve.