Dënimi me vdekje ka shënuar një rritje alarmante në nivel global gjatë vitit 2025, paralajmëroi sot Komisioneri i Lartë i OKB-së për të Drejtat e Njeriut, Volker Turk, duke shprehur shqetësim të veçantë për situatën në Iran, Arabinë Saudite dhe Shtetet e Bashkuara të Amerikës.
“Ndonëse tendenca globale mbetet e orientuar drejt shfuqizimit universal të dënimit me vdekje, numri i ekzekutimeve është rritur ndjeshëm në 2025, kryesisht si pasojë e një rritjeje të fortë në disa shtete që vijojnë ta zbatojnë këtë dënim”, u shpreh Turk në një deklaratë të publikuar në Gjenevë.
Sipas tij, Zyra e Komisionerit të Lartë ka evidentuar një përdorim gjithnjë e më të gjerë të dënimit me vdekje, shpesh edhe për vepra që nuk përmbushin kriterin e “krimeve më të rënda”, siç përcaktohet nga e drejta ndërkombëtare.
Në Iran, të paktën 1 500 persona janë ekzekutuar gjatë vitit 2025. Sipas Turk, ritmi dhe përmasat e këtyre ekzekutimeve tregojnë një përdorim sistematik të dënimit me vdekje si mjet intimidimi nga ana e shtetit.
Në Arabinë Saudite, janë ekzekutuar të paktën 356 persona, mes tyre edhe të paktën dy të mitur, duke tejkaluar rekordin e vendosur një vit më parë, në 2024.
Ndërkohë, në Shtetet e Bashkuara të Amerikës janë regjistruar 47 ekzekutime gjatë vitit 2025, shifra më e lartë e 16 viteve të fundit, sipas të dhënave të cituara nga Komisioneri i Lartë i OKB-së për të Drejtat e Njeriut.