Kryeministri Edi Rama ka reaguar ndaj debatit publik për mungesën e avionëve zjarrfikës gjatë zjarreve masive që po përfshijnë vendin. Në një komunikim me ndjekësit në rrjete sociale, ai u shpreh se nuk ka asnjë avion për përdorim personal, ndërsa udhëtimet zyrtare kryhen përmes një shoqërie ajrore të kontraktuar.
“Disa keqinformohen duke thënë se qeveria ka blerë avion për vete. Nuk kemi avionë personalë. Avioni që përdoret për udhëtime zyrtare nuk ka lidhje me emergjencat. Për udhëtime private përdor avionë linje, gjithmonë ekonomik, shpesh me familjen,” tha Rama.
Ai nënvizoi se Shqipëria ka përfituar nga mekanizmi evropian i emergjencave civile, duke aktivizuar të gjitha forcat ajrore dhe strukturat e tjera të nevojshme. Gjatë ndërhyrjes së fundit në zjarret, në terren kanë qenë:
5 njësi ajrore të Forcave të Armatosura shqiptare
1 Canadair nga Italia
2 avionë nga Greqia
1 avion nga Kroacia
2 avionë suedezë
disa helikopterë nga vende të tjera
“Pa diskutim, do të ishte më mirë sikur të kishim avionët tanë, por duhet të kuptojmë që avionët nuk janë një fjalë goje. Shpesh përmendet e pavërteta rreth avionit që përdor unë personalisht, por realiteti është krejt tjetër,” shtoi kryeministri.
Rama theksoi se bashkëpunimi me BE-në dhe vendet fqinje ka garantuar një mbështetje ajrore më të madhe se çdo vit tjetër, duke ndihmuar në ndalimin e përhapjes së flakëve dhe në mbrojtjen e banorëve.
Radar.al