Një aksident i rëndë ka ndodhur paraditen e sotme në autostradën A1 midis Arezzos dhe Firences, ku një kamion, për shkak të mungesës së frenimit në kohë, është përplasur me disa automjete të ndaluara nga një bllokim trafiku.
Përplasja tragjike mori jetën e tre personave që ndodheshin në një ambulancë – një pacient 75-vjeçar dhe dy infermierë – ndërsa 15 të tjerë mbetën të plagosur, mes tyre një në gjendje kritike.
Sipas dëshmitarëve, ambulanca u shtyp nga forca e goditjes dhe shpërtheu në flakë, por shoferët e tjerë ndërhynë dhe arritën ta shuanin zjarrin në kohë. Aksidenti përfshiu gjithashtu një kamion tjetër, një makinë me karvan dhe një autobus turistik.
Autostrada mbeti e mbyllur për disa orë, ndërsa ekipet e emergjencës punuan për evakuimin dhe pastrimin e zonës.