Dy persona janë arrestuar gjatë ditës së sotme nga shërbimet e Policia Kufitare në pikën e kalimit kufitar të Kapshticë, në dy raste të ndara që lidhen me veprat penale në fushën e narkotikëve.
Rasti i parë është regjistruar në hyrje të Shqipërisë, ku gjatë kontrolleve të shtuara është ndaluar shtetasi P. H., 35 vjeç, banues në fshatin Sovjan, Maliq. Sipas burimeve zyrtare, ai ishte i shpallur në kërkim dhe ndaj tij Gjykata e Korçës kishte caktuar masën e sigurisë “arrest në burg”, për veprat penale “prodhimi dhe shitja e narkotikëve” dhe “shtytja e të miturve në krim”. 35-vjeçari po kthehej drejt Shqipërisë nga Greqia në momentin e arrestimit.
Ndërkohë, në një tjetër rast, gjatë kontrolleve të bazuara në analizën e riskut, shërbimet e Policisë Kufitare Kapshticë dhe Korçë kanë goditur një rast të tentativës për trafikim droge në dalje të vendit.
Gjatë kontrollit fizik ndaj shtetasit O. J., 21 vjeç, banues në Greqi dhe pasagjer në një linjë autobusi me destinacion Greqinë, u gjet dhe u sekuestrua një sasi lënde e dyshuar narkotike cannabis sativa.
Në përfundim të veprimeve procedurale, ndaj 21-vjeçarit ka nisur procedimi penal për veprën penale “prodhimi dhe shitja e narkotikëve”. Materialet procedurale janë referuar në Prokuroria e Korçës për veprime të mëtejshme.