Qyteti Toyoake, në prefekturën Aichi të Japonisë, po shqyrton një nismë të pazakontë: kufizimin e përdorimit të smartfonëve në vetëm dy orë në ditë, jashtë orarit të shkollës apo punës.
Sipas draftit, masa do të jetë vetëm rekomanduese dhe nuk do të shoqërohet me gjoba. Kryebashkiaku Masafumi Koki tha se qëllimi është “të parandalohet përdorimi i tepërt i pajisjeve, i cili ndikon në shëndetin fizik e mendor dhe sjell probleme me gjumin.”
Plani parashikon që nxënësit e shkollës fillore të mos përdorin telefona pas orës 21:00, ndërsa të rinjtë më të rritur pas 22:00.
Megjithatë, nisma ka shkaktuar reagime të shumta online. “Dy orë janë të pamundura, vetëm një film zgjat më shumë,” shkruajnë përdoruesit në “X”. Të tjerë theksojnë se kjo është një çështje që duhet t’u lihet familjeve, jo autoriteteve.
Projektligji pritet të shqyrtohet javën e ardhshme dhe, nëse miratohet, do të hyjë në fuqi në tetor. Vendime të ngjashme janë marrë më parë në Japoni, si në prefekturën Kagawa në vitin 2020, ku fëmijëve iu vendosën kufizime të ngjashme për lojërat dhe përdorimin e telefonave.