Politikani opozitar britanik, Nigel Farage në intervistë për Top Channel thotë se shifrat e tij për shqiptarët në Britaninë e Madhe janë të sakta dhe akuzon Edi Ramën për gabime në statistikë. Ai sqaron se sipas të dhënave zyrtare të tetorit 2024, janë rreth 53,000 shqiptarë në Britani dhe 1,200 prej tyre janë në burg, pra 1 në 50 shqiptarë në Britani është në burg. Farage thekson se kjo është arsyeja pse shqiptarët që kryejnë krime duhet të kthehen në Shqipëri dhe kritikoi Ramën për mospranim të këtyre shifrave.
Ai thotë se Rama është kundër Brexit dhe se e ka sulmuar pa bazë lidhur me numrin e shqiptarëve të burgosur. Farage shpreh gatishmërinë për të vijuar një debat dhe madje për të takuar Ramën në Tiranë për drekë, duke shtuar se do të flasin për marrëdhëniet mes dy vendeve.
Farage shton se nëse shifrat e tij janë gabim dhe numri i shqiptarëve është më i madh, atëherë kjo e vërteton edhe më shumë çështjen për kthimin e të dënuarve në Shqipëri. Ai vlerëson bashkëpunimin midis Shqipërisë dhe Mbretërisë së Bashkuar në çështjen e transferimit të të dënuarve si një fillim pozitiv, por e quan të çuditshme që Rama e sulmon atë në vend që të promovojë këtë bashkëpunim.
Në përgjigje të pyetjes nëse do të kërkojë falje në rast se shifrat janë të pasakta, Farage thotë se shifrat e tij janë bazuar në statistika zyrtare dhe se nëse shumë shqiptarë janë ilegalë, kjo vetëm e forcon argumentin e tij për kthimin e tyre në Shqipëri.