Një episod i rëndë dhune është raportuar mbrëmjen e sotme në zonën pranë ish-Doganës, pas rezidencës “Fole”, ku një grup prej rreth 10 deri në 15 të rinjsh dyshohet se kanë ushtruar dhunë fizike ndaj një të riu, përpara se ta fusnin me forcë në një automjet.
Denoncimi është bërë nga një qytetar për median JOQ Albania. “Nga largësia nuk e kam arritur të filmoj mirë, por pashë një grup djemsh që po rrihnin një djalë dhe më pas e futën me zor në një makinë”, shkruan denoncuesi, duke ngritur shqetësimin për një rrëmbim të mundshëm të organizuar.
Ngjarja ka shkaktuar panik te banorët e zonës, ndërsa ende nuk ka një deklaratë zyrtare nga autoritetet policore lidhur me rrethanat apo motivin e mundshëm të këtij akti të dhunshëm. Kamerat e sigurisë në zonë pritet të jenë kyçe në zbardhjen e plotë të incidentit.